അറബിമലയാള സാഹിത്യത്തിലെ ആദ്യ സമ്പൂർണ പ്രണയ കാവ്യമാണ് ബദറുൽ മുനീർ ഹുസ്നുൽ ജമാൽ . പ്രണയത്തിന്റെ കേവലമായ പരികല്പനകൾക്കപ്പുറം സൂഫീ സങ്കല്പത്തിലുളള മിസ്റ്റിക് ഭാവനയാണ് ഈ കാവ്യത്തിന്റെ അന്തർധാരയെന്ന വ്യാഖ്യാനവും പ്രസക്തമത്രേ. മഹാകവി മോയിൻ കുട്ടി വൈദ്യരുടെ ഈ അനശ്വര കാവ്യത്തിന്റെ പിറവിക്ക് 150 വർഷം പൂർത്തിയാകുന്ന വേളയിൽ പ്രസിദ്ധീകരിക്കുന്ന ഈ പുസ്തകം, പ്രസ്തുത രചനയുടെ ഗൗരവതരമായ വായനയിലേക്ക് വഴി തുറക്കുന്നതാണ്. ഹുസ്നുൽ ജമാലിന്റെ പ്രസിദ്ധീകരിക്കപ്പെട്ട ആദ്യ പഠനമായ എഫ്. ഫോസറ്റിന്റെ പ്രബന്ധത്തോടൊപ്പം, അക്കാദമിക രംഗത്തും സാഹിത്യ സാംസ്കാരിക മേഖലകളിലും വ്യക്തി മുദ്ര പതിപ്പിച്ച പ്രമുഖരുടെ പഠനങ്ങളാണ് ഇതിലുൾക്കൊള്ളിച്ചിരിക്കുന്നത്. പ്രണയ സങ്കല്പം, കാല്പനികത, സ്ത്രീവാദ ദർശനം, സൂഫീ പരിപ്രേക്ഷ്യം, പ്രസാധക ചരിത്രം എന്നിങ്ങനെയുള്ള കാവ്യത്തിലെ വൈവിധ്യമാർന്ന അടരുകളെ ആഴത്തിൽ വിശകലനം ചെയ്യുന്ന പ്രബന്ധങ്ങളുടെ സമാഹാരം.
